Kryeministri Edi Rama sulmoi sërish SPAK-un gjatë një fjalimi që mbajti në Ndroq të Tiranës, ku 74 familje të prekura nga tërmeti u futën në banesat e reja.
Rama u ndal te çështja e shkollës ‘Sami Frashëri’ për të cilën ka një hetim nga SPAK.
Ashtu si Erion Veliaj një ditë më parë, edhe Rama ironizoi teksa tha se SPAK po heton për një WC.
“Ti merr përsipër të rindërtosh shkollën simbol të arsimit në Tiranë, që u godit rëndë nga tërmeti, për ta bërë shkollën simbol të rindërtimit dhe ta marrin peng sepse të çojnë në SPAK disa për një WC aty, e duhet te presësh që të bëhet procedura, të bëhet hetimi, të bëhet historia,” tha Rama.
Një ditë më parë, Veliaj tha nga Nju Jorku, se SPAK po heton një WC provizore në këtë shkollë.
“Të jap një rast timin se duket sikur po bëj avokati për diçka që nuk meriton avokati, se ishte një klithmë publike që këtu të veprohet. Unë nuk kam problem që SPAK është duke hetuar murin ndarës midis shkollës “Sami Frashëri” dhe teqes dhe një WC të bërë aty provizorisht për të ngulur një gozhdë. Nuk kam përfitim personal nga “Sami Frashëri” se unë nuk jetoj aty, nuk kam shtuar kat dhe nuk jam më student. Këtë konkluzion do të arrijë edhe SPAK. Ajo WC nuk është më fizikisht aty dhe kur shikon si i ka ngritur opozita këto, nuk është shtëpi private është e bashkisë. Gjasat janë që do mbyllen se nuk ka abuzime. Këtu prevalon interesi publik”, Erion Veliaj.
