Raundi i dytë për zgjedhjen e presidentit të ri do të mbahet në kuvend më 23 maj, në orën 18:00. Ky ishte propozimi i Taulant Ballës në konferencën e Kryetarëve të mbajtur këtë të martë, miratuar më pas nga deputetët.
Raundi i parë për zgjedhjen e presidentit dështoi të Hënën, pasi nuk u propozua asnjë kandidat.
“Bazuar në nenin 109 të rregullores, në vijim të propozimit të Enkelejd Alibeaj për të marrë afatin maksimal përllogaritur nga dita e djeshme, propozoj që raundi i dytë të zhvillohet ditën e hënë në datën 23 maj në orën 18:00. Më fundor se kaq nuk ka. Pra besoj ky është propozim që biem të gjithë dakord”, u shpreh Balla.
Mes palëve nuk ka ende dakordësi për një emër konkret. Në mbledhjen e sotme të Konferencës së kryetarëve, deputetët e opozitës akuzuan se mazhoranca po synon të djegë tre raundet e para për të zgjedhur më pas Presidentin e ri me shumicë të thjeshtë.
Enkelejd Alibeaj tha se Rama është hipokrit dhe se po kërkon që të shtyjë raundët që të shkojë tek raundi i 4. Ai theksoi se “nuk kemi asnjë lloj instrumenti për ta ndaluar, vetëm moralin”. Grida Duma u shpreh se opozita duhet të japë propozimet e veta dhe nëse mazhoranca nuk i pranon atëherë mbetet që ajo ta zgjedhë e vetme Presidentin e ri. Kreu i Partisë Republikane, Fatmir Mediu tha se kolegët e opozitës duhet të bien dakord ose të sjellin emrin e një kandidati për president, ose të vendosin ndërprerjen e pjesëmarrjes në këtë proces.
Nga ana tjetër, deputetët e mazhorancës pretenduan se janë të hapur për bashkëpunim.
Megjithatë, me shumë gjasë Presinderi i ri do të zgjidhet në mënyrë të njëanshme nga mazhoranca pas raundit të tretë.
