Në sallën e Kuvendit ka pasur një konflikt verbal mes dy deputetëve të Partisë Demokratike.
Në një moment deputeti i PD-së, Edmond Spaho u ngrit nga karrigia e tij dhe iu afrua Gazment Bardhit duke iu drejtuar me tone të larta: “O shpifës! Si nuk të vjen turp”.
Pasi bëri debat ditën e sotme në sallën e Kuvendit me deputetin Gazment Bardhi, vjen një reagim nga Edmond Spaho.
Ky i fundit në një prononcim për mediat, deklaroi se dje në emisionin ‘Open’, Bardhi ka shpifur për vilën e një deputeti opozitar me vlerë 760 mijë euro.
“Ka shpifur dje në një emision që vilën prej 760 mijë euro mund ta ketë një nga katër deputetëve Noka, Shehu, Spaho dhe Leskaj. I mbushi brekët dhe nuk pranonte që e ka thënë”. “I thamë që je shpifës, gënjeshtar dhe legen që thotë se vila 760 mijë euro është e njërit nga katër deputetët Noka, Shehu, Spaho, Leskaj”, tha Spaho.
Kurse në një postim online, Spaho shkroi:
Gazmend Bardhi është mashtrues, gënjeshtar, i pafytyrë, intrigant, burrë legen dhe pa të poshtme.
Vetëm sharlatanë si Gazi mund të thonë shpifje të tilla për qëllime politike. Të jesh i pasur nuk është krim. Krim është të vjedhesh për të bërë pasuri. Edmond Spaho gjithë jetën e tij, nga dita e parë që ka dalë në punë dhe deri më sot, ka jetuar me shpatullat e tij dhe pagën e punës që ka bërë. Asnjëherë nuk kam pasur ndonjë biznes në emrin tim apo të të afërmëve. Askush nga rrethi im familjar nuk merret me biznes dhe nuk ka pasuri të tilla.
Ajo çka unë dhe familja ime disponojmë është në dritë të diellit, deklaruar në ILDKP që nga viti 1993 kur kam deklaruar për herë të parë e deri më sot. Kush të doje mund të shkojë t’i shohë dhe nxjerrë vetë konkluzione.
Gazi bën mirë të kujdeset për pronat e tij. Nëse merret me të tjerët, të merret me pronat e atij që jo vetëm i lepihet por dhe e përdor si Mon Kukalesh në fushata. Shiko hallet që të kanë zënë more derëzi, mos hap fronte të tjera se mjaft e ke ngjarjen në Elbasan.
