Sa duket, autobusët e Tiranës vazhdon që t’i ndjekë mallkimi. Për një periudhë kohore prej 13 ditësh, është shënuar incidenti i katërt.
Autobusi i linjës “Qyteti Studenti-Jordan Misja” ka pësuar defekt dhe ka mbetur në mes të rrugës.
Autobusi po dilte nga rruga “Jordan Misja” për të shkuar tek ish- Stacioni i Trenit. Në pamje shihet se nga kjo situatë është krijuar trafik i dendur.
Fatmirësisht nuk raportohet për persona që të jenë lënduar nga incidenti. Aksidenti më i rëndë ka ndodhur më 29 prill.
Një autobus i linjës së “Unazës së Re” në Tiranë u përplas me një makinë, dhe përfunduan në mes të lumit të Lanës. Aksidenti i frikshëm ndodhi në orën 20:10 te kinema “Agimi”. Pesë persona mbetën të plagosur, por fatmirësisht nuk morën dëmtime serioze.
Më 2 maj, vetëm 3 ditë më pas, një urban i linjës “Qytet Studenti – Jordan Misja” u përplas me stacionin në afërsi të maternitetit “Mbretëresha Geraldinë” te ish-stacioni i Trenit.
Më pas, autobusi i linjës “Kristal-Qendër” u përplas me një karrotrec po te stacioni i Trenit. Fatmirësisht nuk pati të lënduar. Ky është aksidenti i katërt në harkun kohor të 2 javëve.
