Kryeministri Edi Rama ka vizituar sot në Hagë, ish-Presidentin e Kosovës, Hashim Thaçi.
Ky i fundit ndodhet në qelitë e paraburgimit, pasi ndaj tij janë ngritur akuza për krime lufte.
Kryeministri po drejton një proces negociatash me një pjese të opozitës për zgjedhjen e presidentit, proces i cili konsiderohet si farsë nga opozita zyrtare e përfaqësuar nga Komisioni i Rithemelimit, por edhe nga LSI.
Rama ka thënë më herët se nëse Hashim Thaçi do të ishte i lirë, me siguri që do të ishte president i Shqipërisë.
“Ne do ta kishim bërë Hashim Thaçin president me siguri dhe do të ishte një president i shkëlqyer për Shqipërinë e Kosovën dhe do ta kishim votuar me bindje dhe kënaqësinë më të madhe, por fatkeqësisht Hashim Thaçi nuk është i pranishëm për momentin në jetën e bashkësisë shqiptare si një qytetar i lirë sepse për momentin ndaj tij po zhvillohet një proces, i cili mos më bëni ta them se çfarë procesi është”, tha Rama.
Nuk dihet nëse në takimin që ka pasur me Thaçin, Kryeministri ia ka shprehur edhe këtë dëshirë që ka pohuar publikisht në Tiranë, kur është pyetur lidhur me Presidentin.
Rama ka postuar në rrjetin social një video, ku shfaqet duke hyrë në ambientet e paraburgimit. Dhe duke njohur Kryeministrin, duket se edhe vizitën te Thaçi do e shfrytëzojë për show dhe propagandë.
