Detaje të reja raportohen lidhur me ngjarjen e rëndë të ndodhur në dhomat e paraburgimit të Komisariatit të Kavajës, ku u gjet pa shenja jete 31-vjeçari, Ilvi Meta.
Në fillim ngjarja u raportua si një vetëvrasje, ndërsa u hodh dyshimi se 31-vjeçari ishte vetëvarur në qeli me çarçaf.
Ngjarja ka ndodhur rreth orës 19:00, ndërsa i riu ishte ndaluar nga policia si i dyshuar për disa vjedhje. Ai ishte shoqëruar në komisariat rreth orës 14:00, dhe 5 orë më pas u gjet pa shenja jete.
Sipas burimeve nga grupi hetimor, bëhet me dije se viktimës i janë gjetur shenja të tjera në fytin e tij, përveç asaj që krijon një vetëvarje.
Por këto shenja mendohet se nuk janë shkaktuar vetëm nga vetëvarja. Ende nuk dihet shkaku, ndërkohë pritet njoftimi i plotë nga grupi i ekspertizës që Gledis Nano ka dërguar për të bërë zbardhjen e ngjarjes së rëndë.
Ngjarja në fjalë po hetohet nga Agjensia e Mbikqyrjes Policore, Prokuroria e Kavajës dhe një grup inspektimi i ngritur nga Drejtori i Policisë, Gledis Nano.
Nga raportimet e para, mësohet se nga grupi i hetimit të prokurorisë është konkluduar se në trupin e viktimës nuk ka pasur shenja dhune. Por duket se ekspertiza mjeko ligjore ka gjetur shenja në fytin e viktimës, për të cilat ende nuk ka një shpjegim.
Hetimet kanë përfshirë punonjësit e policisë që ishin me shërbim gjatë turnit kur ndodhi ngjarja, por deri në orët e vona të mbrëmjes së të mërkurës nuk pati njoftime zyrtare lidhur me ngjarjen dhe zbardhjen e saj.
Në rrjetet sociale janë ngritur dyshime lidhur me humbjen e jetës së të riut. Ish-Kryeministri Sali Berisha e ka cilësuar një vrasje të dhunshme vdekjen e 31-vjeçarit dhe ka kërkuar nga Avokati i Popullit të hetojë ngjarjen. Ndërkohë që avokati Altin Goxhaj shkruan se kemi të bëjmë me një humbje jete për shkak të dhunës policore, që i riu të pranonte një vepër penale që nuk e kishte kryer. Madje Goxhaj sjell në vëmendje ngjarjen që ndodhi në Tiranë, ku një i ri u vra nga një efektiv policie.
