Politikanët shqiptarë kanë uruar Fitër Bajramin. Ish-kryeministri Sali Berisha ka uruar shqiptarët për këtë festë tepër të rëndësishme për besimtarët myslimanë .
“Të dashur miq, besimtaret myslimanë nderojnë sonte përfundimin e agjërimit të muajit të madhnueshëm të Ramazanit.
Prandaj me këtë rast ju ftoj miq të dashur të urojmë nga zemra të gjithe ata që agjëruan, por dhe të gjithë besimtarët myslimanë e besimtarët e Zotit që i Gjithfuqishmi të pranojë sakrificën e tyre dhe t’ua shpërblejë me mirë si atyre, familjeve të tyre dhe kombit shqiptar!”, uron Berisha.
Ndërsa, Edi Rama ka uruar Fiter Bajramin për të gjithë besimtarët myslimanë. Gjatë një postimi të shkurtër në rrjetet sociale, Rama ka zgjedhur që të urojë shqiptarët duke publikuar pamjet e Xhamisë së re në Mullet.
“MIRËMËNGJES dhe me pamjet e bukura të Xhamisë së re në Mullet, uroj të gjithë besimtarët myslimanë gëzuar festën e Fitër Bajramit”, shkruan Rama.
Gjithashtu edhe ish-kreu i Partisë Demokratike, Lulzim Basha ka uruar shqiptarët duke shkruar: “Të nderuar besimtarë myslimanë, nga zemra ju uroj Gëzuar Fitër Bajramin! Zoti ju faltë shëndet, mbarësi dhe mirësi ju dhe familjeve tuaja!”
