Deputeti socialist Alfred Peza u thirr sot në Prokurorinë e Përgjithshme për t’u pyetur për pasuritë e tij. Lidhur me hetimet mbi dyshimet e fshehjes së pasurise, pastrimit të produkteve të veprës penale dhe falsifikimit të parave.
Procedimi penal ndaj Pezës u regjistrua pak ditë më parë nga organi qendror i akuzës, pas publikimit në media të dyshimeve për blerjen e aksioneve në bankën “Credins” nga bashkëshortja e deputetit me vlerë 1.13 miliardë lekë.
Top Channel raporton se jo zyrtarisht thuhet se Peza ka deklaruar se çdo pyetjeje të prokurorisë do t’i bashkangjisë dokumentacionin përkatës.
“Është një procedurë normale që zbatohet në të gjitha çështjet e tilla. Sa i përket hetimit nuk dua të bëj asnjë koment pasi duhet t’i lëmë të gjithë njerëzit që po punojnë të bëjnë detyrën e tyre. Ndërsa sa më përket mua, do të doja të përfitoja nga rasti për të rikonfirmuar se s’ka asgjë të jashtëligjshme në pasurinë time dhe atë të familjarëve të mi”, tha Peza për mediat.
