Ka përfunduar procesi i zgjedhjes së kryetarit të ri të degës së Partisë Demokratike në Bulqizë. Procesi i nisur në orën 9:00 të së martës është mbyllur rreth orës 23 e 15 minuta.
Për të votuar rreth 1037 anëtarë të PD në Bulqizë u deshën më shumë se 12 orë. Procesi është shoqëruar gjatë gjithë ditës me tensione, duke u ndërprerë disa herë.
Simpatizantë të të dy kandidatëve shqyen derën e sallës ku po zhvillohej procesi zgjedhor, për t’u futur në radhë që të mund të votonin.
Pas ndërhyrjes së përfaqësuesve të Komisionit të Rithemelimit të PD, procesi ju rithye normalitetit, por sërish janë dashur afro 12 orë që të gjithë anëtarët të mund të votonin njërin nga kandidatët në garë, mjekun Fatos Hoxha dhe avokatin Shaqir Manjani.
Pas numërimit të të gjitha votave të vlefshme, kandidati Fatos Hoxha ishte votuar nga 587 anëtarë, ndërsa kandidati tjetër Shaqir Manjani nga 442 anëtarë, duke bërë që kryetar i ri i PD në Bulqizë, të zgjidhej Fatos Hoxha. 8 vota rezoltuan të pavlefshme.
Zgjedhjet për kryetarin e ri të degës së PD në Bulqizë janë shoqëruar me tension dhe akuza që të dielën. Kandidatët Fatos Hoxha dhe Defrim Fiku akuzuan për tjetërsim të listës së votuesve, ku sipas tyre në të ishin shtuar rreth 500 emra, numër i cili mund të bënte fitues kandidatin Shaqir Manjani. Ata kërkuan shtyrjen e zgjedhjeve për të martën.
Ndërkohë, kandidati Defrim Fiku i cili mbante aktualisht detyrën e Kryetarit të PD në Bulqizë, u tërhoq nga gara duke lënë të garonin mjeku Fatos Hoxha dhe avokati Shaqir Manjani.
