Policia e Durrësit ka goditur një tjetër rast të organizimit të veprimtarisë së kundërligjshme në fushën e lojërave të fatit.
Uniformat blu bëjnë me dije se në prangat e policisë ka rënë Ermal Shehu i cili kishte kthyer lokalin në “kazino”. Gjatë kontrollit janë sekuestruar një kompjuter, 4 makineta për lojëra fati dhe 1 celular që përdorej për vendosjen e basteve sportive.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
Njoftimi i plotë i policisë Durrës:
Vijon operacioni policor i koduar “Fati i lojërave”. Goditet 1 rast tjetër i organizimit të veprimtarisë së kundërligjshme në fushën e lojërave të fatit.
Arrestohet në flagrancë 32-vjeçari që kishte vënë në dispozicion ambientet e lokalit që kishte marrë me qira, për organizimin e lojërave të fatit.
Sekuestrohen një kompjuter, 4 makineta për lojëra fati dhe 1 celular që përdorej për vendosjen e basteve sportive.
Specialistët për Hetimin e Krimit në Komisariatin e Policisë Durrës, në vijim të operacionit policor të koduar “Fati i lojërave”, me qëllim goditjen e veprimtarive të paligjshme në fushën e organizimit të lojërave të fatit, kanë bërë të mundur goditjen e një rasti tjetër të kësaj veprimtarie.
Si rezultat i këtij operacioni u arrestua në flagrancë shtetasi E. Sh., 32 vjeç, banues në Durrës, për veprat penale “Organizimi i lotarive të palejuara” dhe “Vënia në dispozicion e lokaleve për lojëra të palejuara”.
Bazuar në informacionet e marra në rrugë operative, specialistët për Hetimin e Krimit në Komisariatin e Policisë Durrës kanë ushtruar kontroll në lokalin që ky shtetas kishte marrë me qira, ku kanë gjetur dhe sekuestruar, në cilësinë e provës materiale, 1 kompjuter, 4 makineta për lojëra fati dhe një aparat celular që përdorej për vënie bastesh në mënyrë të kundërligjshme.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
