Rayo Vallecano është kthyer nga një skuadër e cila po luftonte për Europën në pjesën e parë të sezonit, në një ekipi i cili pak nga pak po përfshihet në luftën për të mos rënë nga La Liga. Humbja e sotme me shifrat 1-0 ndaj Deportivo Alavesh, ka komplikuar edhe më shumë situatën në një sfidë të cilën Ivan Balliu e mbylli me karton të kuq.
Hoselu shënoi golin e vetëm në minutën e 64-t dhe më pas ishte skuadra e mbrojtësit shqiptar që kishte iniciativën. Vetë futbollisti shpërtheu në një nga aksionet e tij të zakonshme në krahun e djathtë në minutën e 88 të sfidës, por gjatë aksionit u përplas me Duarte dhe shkeli këtë të fundit.
Gjyqtarët me sa duket e interpretuan këtë si një veprim të qëllimshëm dhe pasi Balliu u ndëshkua me të verdhë, VAR- i bëri thirrje kryesorit që t’i nxirrte të kuqin, siç ndodhi mes protestave të futbollistëve të Rajon dhe vetë Balliut që nuk u besonte syve.
