Dy të rinj nga Tirana kanë rënë në prangat e policisë në Gjirokastër, pasi akuzohen se kanë ndihmuar refugjatë të kalojnë kufirin, kundrejt fitimit.
Policia bën me dije se në kuadër të operacionit policor “ROAD GUARD 10”, u bë arrestimi në flagrancë i F. T., 21 vjeç dhe D. H., 24 vjeç, banues në Tiranë.
“Në aksin rrugor Kakavije-Gjirokastër, në vendin e quajtur ‘Vanistër’, shërbimet e Policisë Rrugore i kanë bërë shenjë ndalimi automjetit me drejtues shtetasin F.T., i cili nuk i është bindur urdhrit të punonjësve për të ndaluar. Policia u vu në ndjekje të mjetit dhe në vendin e quajtur ‘Ura e Lumit’, Gjirokastër, kanë kapur shtetasit F. T. dhe D. H., të cilët ishin duke transportuar 7 emigrantë të paligjshëm nga vendet MENA, kundrejt fitimit”, njoftoi policia.
Automjeti i tyre dhe dy aparate celulare u sekuastruan nga policia.
