Frida Krifca, ministre e Bujqësisë, u shpreh mbrëmjen e sotme në emisionin Opinion, se gripi i shpendëve nuk njeh territor dhe është një sëmundje infektive që përhapet kudo.
Krifca tha se pulat apo vezët e pulave të infektuara nuk janë konsumuar nga qytetarët. “AKU ka qenë në territor, ka ushtruar kontrolle në stabilimentet e vezëve dhe mishit, dhe këto kontrolle kanë nisur që prej muajit janar. Nuk ka asnjë verifikim që të jenë hedhur në treg pula apo vezë të shpendëve të infektuar”, tha ajo.
Krifca tha se gripi i shpendëve është i përhapur në 5 qarqe, mes të cilëve edhe Dibra, Tirana, Durrësi.
Krifca tha se nuk ka asnjë rrezik nëse konsumohen mish pule apo veze, ndërsa u shpreh se duhen gatuar në temperatura mbi 80 gradë.
“Nuk krijohen probleme edhe po u konsumuan, nëse gatuhen në temperatura të larta”, tha ajo.
