Autoriteti Kombëtar i Ushqimit bllokoi 1400 kg djathë pas një kontrolli të ushtruar në tre subjekt në Lushnjë. Sipas AKU-së, subjektet ushtronin aktivitet në kushte të papërshtatshme higjieno – sanitare si dhe nuk dispononin sistemin e gjurmueshmërisë.
“Në sajë të indicieve dhe bashkëpunimit me shoqërinë civile u kryen kontrolle zyrtare në 3 subjekte me iniciale V.D., A.K. dhe V.P. në qytetin e Lushnjës. Nga kontrolli i kryer, u konstatua se 1 subjekt ushtronte veprimtarinë në kushte të papërshtatshme higjieno-sanitare, nuk implementonte sistemin e vetëkontrollit (HACCP), nuk dispononte sistemin e gjurmueshmërisë, si dhe tregtonte produkte me etiketë të panotifikuar. Ndërsa në kontrollet e kryera në 2 subjektet e tjera u konstatua se nuk implementohej manuali i vetëkontrollit (HACCP), nuk disponohej sistemi i gjurmueshmërisë, si dhe tregtoheshin produkte me etiketë të panotifikuar”, informoi AKU.
Sipas AKU-së, trupa inspektuese vendosi masat administrative përkatëse, si dhe bllokoi 1400 kg djathë të bardhë, njomëz dhe djathë kaçkavall.
