Nga 1 prilli të gjitha kategoritë e pensioneve rriten me 3.3%.
Ministrja e Financave dhe Ekonomisë, Delina Ibrahimaj deklaroi sot se nga vendimi për indeksimin e pensioneve, miratuar sot në mbledhjen e Këshillit të Ministrave përfitojnë të gjitha kategoritë e pensionistëve.
Ministrja pas mbledhjes së qeverisë theksoi se, pavarësisht se norma mesatare e inflacionit në vitin 2021 ishte 2.4 %, normë e cila shërben në bazë të ligjit për indeksimin e pensioneve në vitin pasardhës, qeveria vendosi të rrisë pensionet me 3.3 %.
Ibrahimaj tha se vendimi erdhi pasi çmimet në muajt janar dhe shkurt të këtij viti kanë shënuar rritje.
Ministrja tha se kjo masë përfitimi i shtohet Paketës së Rezistencës Sociale nga e cila 576 mijë persona përfitojnë një bonus prej 3 mijë lekësh.
Paketa e Rezistencës Sociale sipas ministres, subvencionon edhe çmimin e energjisë për të gjithë qytetarët, mbështet me 500 milionë lekë fermerët për të përfituar naftën pa taksa, si dhe transportin publik për të mbajtur të palëvizur çmimin e biletës.
