Partia Demokratike kërkon që kryeministri Edi Rama të mos bllokojë kërkesën e Prokurorisë së Posaçme për arrestimin e deputetit të PS-së, Alqi Bllako.
“Sot, Spak njoftoi se ka kërkuar heqjen e imunitetit të deputetit socialist Alqi Bllako. Partia Demokratike i kërkon Edi Rames të mos bllokojë kurrësesi kërkesën e prokurorisë për hetimin e aferës se incerenatorëve, njërës prej aferave më të mëdha të korrupsionit në Shqipëri”, thuhet në një njoftim të zyrës së shtypit të PD-së.
“Partia Demokratike shton se Alqi Bllako, i zhytur kokë e këmbe në aferën e incerenatorëve, është vetëm nënfishi i Engjëll Agaçit, Arben Ahmetajt, Erion Veliajt dhe padyshim i Edvin Ramës, përgjegjesia direkte e të cilëve në kuadrin e nje grupi te strukturuar kriminal, është tashmë e qartë si drita e diellit”, mbyllet njoftimi.
Prokuroria e Posaçme ka depozituar në Kuvend kërkesën për heqjen e imunitetit të Alqi Bllakos, për të cilin konstaton se ka kryer shkelje ligjore në procedurën për inceneratorin e Fierit.
“Për shtetasin Alqi Bllako, nisur nga fakti që është i zgjedhur deputet në Kuvendin e Republikës së Shqipërisë, Prokuroria e Posaçme bazuar në parashikimet e nenit 73/2 të Kushtetutës së Republikës së Shqipërisë dhe nenit 288/1/2 të Kodit të Procedurës Penale, do të paraqesë kërkesë Kuvendit për dhënie të autorizimit për caktimin e masës sigurimit personal ‘arrest në burg’”, njoftoi më herët SPAK.
Lexo edhe:
SPAK kërkesë Kuvendit për arrestimin e Alqi Bllakos, të atit i sekuestrohet shtëpia në Tiranë
