Ditën e sotme, u publikua një lajm lidhur me një tjetër rast të ushtrimit të dhunës ndaj femrave në Tiranë. Agresori ishte Denis Telo i njëjti i cili ka dhunuar vazhdimisht femra nëpër rrugët e Tiranës dhe nuk është marrë asnjë masë nga ana e policisë.
Viktimat e tij kësaj here ishin dy motrat aktiviste, Mirela dhe Albina Ruko të cilat siç shihen edhe në videon e mëposhtme kanë qenë duke ecur në rrugë kur papritmas janë sulmuar pabesisht nga agresori Denis Telo.
Për shtetasin Telo, mësohet se ka në total 9 kallëzime në polici dhe ende nuk është marrë asnjë masë ndaj tij, duke bërë që të endet i lirë nëpër rrugët e Tiranës, ku është një rrezik i madh për femra të tjera të cilat mund të dhunohen.
NDAL DHUNËS NDAJ VAJZAVE!
Sot rreth orës 13:00 dy aktivistet e Organizatës Politike Albina Ruko dhe Mirela Ruko janë sulmuar dhe goditur fizikisht pranë vendbanimit të tyre. Pas denoncimit në polici, morëm vesh se keqbërësi, i quajtur Denis, është një personazh famëkeq, i njohur edhe nga policia si dhunues përsëritës i vajzave në rrugët e Tiranës. Ndaj këtij personi ka të paktën 8 kallëzime në polici për dhunë ndaj vajzave, por në të gjitha rastet institucionet ligjzbatuese e kanë lënë të lirë.
Përgjegjës për dhunën kafshërore ndaj shoqeve tona dhe vajzave të tjera nuk është vetëm ky keqbërës, por edhe i gjithë zinxhiri i institucioneve shtetërore që vazhdojnë të tolerojnë krime të tilla: nga policia te prokuroria dhe çdokush që ka në dorë të frenojë dhunën. Për këto institucione, jeta dhe siguria fizike e vajzave janë të parëndësishme.
Edhe sa vajza duhet të dhunohen përpara se shteti të veprojë?! Mos duhet të presim që grushtet keqbërëse të marrin jetë?! Apo ta marrim vetë drejtësinë në dorë?!
Dhuna dhe indiferenca e institucioneve shtetërore na motivojnë edhe më shumë për të luftuar kundër dhunës gjinore dhe diskriminimit të shumanshëm të vajzave dhe grave.
