Pjesëmarrja në Katar 2022, përveçse ka një vlerë të fortë sportive, sjell me vete një vlerë ekonomike. Një aspekt që nuk duhet nënvlerësuar duke pasur parasysh rëndësinë e vazhdimësisë në nivele të larta në futbollin modern, jo vetëm për klubet por edhe për Federatat. Pra, cilat janë çmimet e parashikuara për edicionin e ardhshëm të spektaklit të futbollit botëror?
Për edicionin e vitit 2022, FIFA ka parashikuar një miliardë dollarë në total premio për pjesëmarrësit, 29% më shumë në krahasim me Botërorin Rusi 2018. Rritja e premiove u arrit pasi FIFA ka nënshkruar marrëveshjet e të drejtave televizive të ciklit katërvjeçar, që në këtë rast fillon nga viti 2019 deri në vitin 2022.
Shifrat e arritura me këto akorde kanë ndihmuar në rritjen e totalit të premiove, i cili nuk do të shpërndahet vetëm mes kombëtareve pjesëmarrëse, të cilët sigurisht do të marrin pjesën e “luanit” por do të shpërndahet edhe si solidaritet mes Federatave të tjera dhe këtu përfiton edhe Federata Shqiptare.
Gjithsesi për ekipet e kualifikuara në Botëror, premiot nisin me 10. 5 mln dollarë të garantuara, 2.5 mln për pjesëmarrjen dhe 8 mln dollarë për fazën e grupeve.
Kualifikimi në 1/8 e Botërorit pasuron çdo Federatë përkatëse me 12 mln dollarë dhe nëse arrin deri në çerekfinale, i shtohen edhe 4 mln të tjera duke e çuar në 16 mln dollarë premion.
Ndërkohë vendi i katërt në Botërorin e Katarit e çon në 22 mln dollarë premion ndërsa vendi i tretë 26 mln USD.
Ndërkohë finalistët do të marrin 32 mln USD në total si premio dhe ekipi kampion 45 mln dollarë dhe me disa bonuse mund ta çojnë këtë shumë deri në 47.5 mln dollarë ose 43.2 mln Euro./
