Nga Boldnews.al
Të dhëna të siguruara ekskluzivisht nga Boldnews.al, tregojnë për një përgjim telefonik mes ish Shefit të Rendit të arrestuar 2 ditë më parë Haki Hasanbegasi dhe trafikantit të drogës Elton Çiça, i vrarë pak muaj më parë tek zona e ish bllokut.
Bëhet fjalë për një bisedë të datës 31 mars 2016, ku Hasanbegasi i cili mbante detyrën e Shefit të Komisariatit të Tepelenës merr një telefonatë nga eksponenti i botës së krimit, Elton Çiça. Ky fundit ishte pjesë e një grupi të strukturuar kriminal që kontrollonte kultivimin e kanabisit në zonën e Tepelenës.
Komunikimi mes tyre shihet që është tepër miqësor dhe bashkëpunues, ndërsa bëjnë humor duke përmendur indirekt Ministrin e Brendshëm Saimir Tahiri.
Më poshtë biseda telefonike e përgjuar më datëk 31.03.2016:
Elton Çiça: Ku je o vlla? S’të rruhet trapi fare për mua?
Haki Hasanbegasi: E po ça të bëj unë…
Elton Çiça: Unë të kam vllai, ti…
Haki Hasanbegasi: Na vuri i ligu para…
Elton Çiça: Kush?
Haki Hasanbegasi: Ai legeni i im dhe i joti
Haki Hasanbegasi: Kush ta ka ça trapin ty? Se për ty prishem me të gjithë, nuk më rruhet trapi.
Lidhja e zyrtarit të lartë të Policisë me Çiçon u zbulua nga Prokuroria e Krimeve të Rënda, ku nga hetimet rezultoi se deri në pranverën e vitit 2016, Hasanbegasi i cili ishte në detyrën e Shefit të Komisariatit të Tepelenës, mbante kontakte të vazhdueshme me persona që kultivonin lëndë narkotike në atë zonë.
Madje, kur është larguar nga drejtimi i Komisarit të Tepelenës për në detyrën e Shefit të Rendit në Drejtorinë e Vlorës, duket se një pjesë e këtyre kultivuesve kanë shprehur shqetësimin për zëvendësimin e tij.
Nga hetimi rezulton se Hasanbegaj ka qenë lidhje e ngushtë e shtetasit Elton Çiça, i cili u vra pak javë pas largimit të Hasanbegajt nga Tepelena, në një atentat në zonën e ish-“Bllokut” në Tiranë. Çiça ishte pjesë e një rrjeti të gjerë kultivimi dhe trafikimi të lëndëve narkotike në zonën e Tepelenës. Çiça rezulton se ka pasur informacion për lëvizjet e drejtuesve në Komisariatin e Policisë Tepelenë. Ai i shpreh mbështetjen e tij Haki Hasanbegajt në momentin që ky po largohej për një Drejtorinë e Policisë së Vlorës.
Po ashtu, Çiça rezulton se ka qenë i informuar se cili do të zëvendësonte Hasanbegajn në drejtimin e komisariatit të Tepelenës, me qëllimin e qartë që të vijonte i pashqetësuar aktivitetin e paligjshëm të kultivimit të lëndëve narkotike.
Nga të dhënat e deritanishme të hetimit rezulton se në rastin konkret ka të dhëna të mjaftueshme për ekzistencën e faktit kriminal, të kultivimit të bimëve narkotike, fakt i cili parashikohet si vepër penale në Kodin Penal.
Njëkohësisht rezulton se personat e përfshirë në këtë aktivitet kriminal, kanë një formë të veçantë bashkëpunimi në kryerjen e veprës penale që për nga forma, struktura dhe qëllimi ka formën e grupit të strukturuar kriminal, sipas përkufizimit të parashikuar në dispozitat e ligjit material dhe procedural penal. Po ashtu rezulton se secila nga grupet e personave të përfshirë në këtë aktivitet kriminal, kanë krijuar lidhje të mëparshme nga punonjës të policive vendore, me qëllim mbrojtjen dhe shmangien nga asgjësimi i bimëve narkotike dhe mos dhënies së informacionit për parcelat e mbjella me bimë narkotike, kundrejt përfitimeve të parregullta.
