Enkelejd Alibeaj, i komanduar nga Gazment Bardhi si Kryetar i PD, pas dorëheqjes së Lulzim Bashës, e konsideron si një vijë të kuqe dhe të panegociueshme kushtin që Sali Berisha të pranohet prej tyre në forumet drejtuese të partisë apo si kandidat për kryetar.
Nga raportimet mësohet se kjo ka qenë porosia që Alibeaj i ka dhënë Sekretariatit të PD, pak përpara nisjes së mbledhjes së Kryesisë, ku deputeti Helidon Bushati ka kërkuar çbunkerizimin e partisë.
Alibeaj ka kërkuar që rezoluta e miratuar nga Grupi Parlamentar, edhe pse në mbledhjen e fundit ishin 17 deputetë, nga të cilët 3 e kundërshtuan publikisht, përmbante pikën 2, e cila ishte e panegociueshme me Komisionin e Rithemelimit.
Kjo pikë përcakton mos lejimin e Sali Berishës për të kandiduar si Kryetar i PD, por edhe pjesëmarrjen e tij në forumet drejtuese të partisë, duke e lidhur këtë me shpalljen “non grata” nga DASH dhe vendimin për përjashtimin e tij nga rradhët e PD përjetësisht.
“Të gjithë kanë rënë dakord që të mos lëshohet pe te vija e kuqe e kësaj rezolute. “Pika 2, vija e kuqe”. Kjo pikë lidhet me faktin se Berisha s’duhet të marrë pjesë në forumet e larta të PD dhe as të mos jetë një nga kandidatët për kryetar në zgjedhjet e reja”, u shpreh Alibeaj.
“Patëm mbledhje me sekretariatin e partisë për të diskutuar në lidhje me situatën në parti. Se pari, për nesër kemi paraqitur mocion me debat. Është nga shenjat e luftës opozitare. Një nga drejtimet ku duhet të ecë partia, është lufta opozitare në parlament e sinqertë dhe e plotë. Së dyti, kemi situatën tonë ku jemi. Për qëndrimin e mëtejshëm. Pesha për secilin është e madhe. Por duhet që të gjithë bashkë të mendojmë se cilat duhet të jenë hapat, të matur, të sigurt”, shtoi ai.
Nuk dihet nëse edhe Kryesia e PD, megjithëse një pjesë e anëtarëve janë të emëruar do e pranojnë “vijën e kuqe” sikundër e cilëson kryetari i komanduar, apo do të ketë kundërshtime.
Por mbajtja e një qëndrimi të tillë duket se i mban shumë larg negociatave PD e mbetur nën drejtimin e Enkelejd Alibeaj dhe Komisionin e Rithemelimit të ish-Kryeministrit Sali Berisha. Ky i fundit ka deklaruar se e vetmja rrugë për bashkimin e demokratëve është vota e lirë, ndërsa e ka konsideruar si një fletushkë atë që Alibeaj e konsideron si rezolutë të grupit parlamentar, edhe pse në mbledhjen e fundit mungonin 14 deputetë, dhe 3 nga të pranishmit në mbledhje janë shprehur kundra.
