Kreu i grupit parlamentar të PS-së, Taulant Balla deklaroi sot se nga nesër, deputetët e PS do të jenë në terren bashkë me ministrat për të verifikuar masat e qeverisë për çështjen e çmimeve.
“Ne do të miratojmë së shpejti aktet normative. Por kanë fuqinë e ligjit dhe po zbatohen. Edhe deputete e PS do t’i bashkohen kolegëve ministra në punën e përditshme me të gjithë qytetarët për të verifikuar masat e marra nga qeveria, përmes grupeve të verifikimit të kontrollit të respektimit të çmimeve, me qëllim që të mos i lëmë hapësirë asnjë abuzuesi për të përfituar në kurriz të qytetarë. Edhe grupi nuk mund të jetë i përjashtuar në një axhendë intensive në të gjitha qarqet, në mënyrë që të gjitha masat e marra nga qeveria për pasojat e kësaj lufte. Nesër do të kemi një mocion me debat të propozuar nga PD, kemi dakordësuar modalitete e këtij debati që do të zgjasë 3 orë. Ne duam që debatin, diskutimet ti bëjmë direkt në terren me njerëzit që na kanë dhënë besimin. Me të mbaruar seancë të gjithë deputetët do të jenë në territor”, tha Balla në një prononcim për gazetarët, pas mbledhjes së grupit parlamentar socialit.
Ai deklaroi pas mbledhjes së Partisë Socialiste se procesi për zgjedhjen e presidentit të ri do të jetë më 24 Maj.
Duke folur për Reformën Territoriale, ai tha se “nëse PD i sjellë emrat që në seancën e nesërme, për të mbledhur të dy komisionet përkatëse, të vijojmë punën. Është e rëndësishme për ne Reforma Zgjedhore dhe vijimi i saj.”
I pyetur për dorëheqjen e Bashës dhe situatën ku aktualisht ndodhet grupi i demorkatëve, Balla shprehet se ata tashmë kanë të komanduar Alibeajn dhe ky i fundit mund të sjellë emrat e tij.
“Di që Alibeaj është aty. Dhe me një fuqi tjetër nesër shpresojmë të kemi emrat për dy komisionet. Për Zgjedhoren dhe tjetrin për të vlerësuar Reformën Territoriale”, tha Balla.
I pyetur nëse do të jetë PS e gatshëm të ulet me Berishën në dy komisionet Territorial dhe atë Zgjedhor, Balla ka thënë se një gjë e tillë nuk është e mundur.
“Është në dinjitetin e Kuvendit. SHBA mbeten aleati i rëndësishëm bashkë me BE në rrugën tonë të anëtarësimit në union. Aleat që punojmë çdo ditë. SHBA e kanë shpallur zyrtarisht Sali Berishën non grata, për minim të demokracisë dhe sabotim të drejtësisë. Pra për mua dhe për çdo qytetarë është non grata edhe për ta pasur në Kuvend. Kjo është bindje që nuk ndryshon. Akuzat që Berisha i bënte ndaj meje i bën tashmë ndaj Bashës”, tha Balla.
Kryetari i Grupit Parlamentar të Partisë Socialiste u shpreh po ashtu se PS po shikon mundësinë të bëjë një tjetër kallëzim për çështjen e CEZ-DIA.
