Kombëtarja shqiptare po vijon përgatitjet në Barcelonë në kuadër të dy miqësoreve ndaj Spanjës dhe Gjeorgjisë.
Përveç mungesave të Mihajt dhe Bajramit, së fundmi ka shfaqur shqetësim dhe gjendja e mesfushorit Amir Abrashi. 31-vjecari ka marrë një goditje ne ndeshjen e fundit me klubin e tij në Zvicër dhe nuk dihet nëse do të jetë gati për ndeshjen e parë.
Mesditën e kësaj të marte, dy lojtarët kuqezi, gardiani Elhan Kastrati dhe mbrojtësi Adrian Bajrami dolën në një konferencë për shtyp ku treguan ambiciet e tyre.
“Shqipëria në këto momente ka një grup shumë kualitativ, e tregojnë dhe rezultatet. Mund të arrijnë diçka shumë të madhe në këto kualifikuese. Grupi është shumë i mirë. Dy miqësoret? Varet nga kundërshtari, kundër Spanjës është pak më i vështirë rezultati të arrihet. Ne do të japim maksimumin. Sa i përket Gjeorgjisë, rezultati është shumë i rëndësishëm. Për ne nuk ka ndeshje miqësore kur ka skuadra mesatare, do të japim maksimumin”, tha Elhan Kastrati.
“Kam kaluar shumë vite në Zvicër, unë jam shqiptar. Kam luajtur me Benfikën dhe në fund kam vendosur se do luaj me Shqipërisë. Model? Jam këtu për të mësuar, e di që mbrojtja është e fortë dhe përbëhet nga lojtarë të fortë. Dita e parë ishte e lehtë, e mendoja më të vështirë. Lenjani dhe Gjimshiti më afruan direkt, shpresoj të kaloj mirë. Dokumentacioni? Shpresoj që të vijë, unë jam në formë. Jam kapiten në ekipin e të rinjve U-23. Është kënaqësi të jesh te Benfika, jam rritur si futbollist. Me kalimin e kohës të shohim”, tha Adrian Bajrami.
Miqësorja e parë për kuqezinjtë është përballë Spanjës në 26 mars dhe 3 ditë më vonë presin Gjeorgjinë në stadiumin kombëtar në Tiranë.
