Anëtari i Komisionit të Rithemelimit të PD, Çlirim Gjata, u shpreh mbrëmjen e sotme në emisionin “Opinion” se zgjidhja për situatën në këtë parti është vetëm vota.
Gjata tha se dy janë shtyllat që përdoren në shoqëritë demokratike: shumica dhe vota.
“Zgjedhjet e 6 marsit treguan se shumica është Komisioni i Rithemelimit. Tani na del pakica dhe vendos kushte, dhe thonë Sali Berisha të bëjë një hap pas. Po nga kush ta bëjë një hap pas Berisha, kur këta e kanë përjashtuar përjetësisht atë nga partia? Pra këta ende i kanë në fuqi vendimet që kanë marrë, pasi shprehen edhe për të pezulluarit dhe përjashtuarit. Tani një gjë duhet ta kemi të qartë: Kryetari i ri i PD është vetëm ai që mund Sali Berishën. Si mundet Berisha? Me votë, pra zgjidhja vjen vetëm me zgjedhje, dhe jo me kushte përjashtuese”, tha Gjata.
