Ndërhyrjet politike në futbollin shqiptar mund të pasohet me një goditje të fortë nga UEFA, teksa po diskutohet spostimi i eventit më madhështor që ka organizuar ndonjëherë Shqipëria, finalja e Conference League në Tiranë.
Duke përfituar nga situata e turbullt në marrëdhënien futboll-shtet, nga vendimet dhe pezullimet e gjykatve që i janë bërë presidentit Armand Duka dhe sekretarit të FSHF-së Ilir Shulku, finalja e madhe rrezikon seriozisht për të mos u zhvilluar në vendin tonë.
Athina dhe Shkupi kanë ngritur veshët dhe kanë hapur sytë fort për të monitoruar të gjithë situatën që po kalon futbolli shqiptar. Madje grekët po punojnë për të bindur drejtuesit e UEFAS se finalja më e mirë do të zhvillohej në Athinë.
Maqedono-veriorët e shohin si një burim serioz gjenerimin e rreth 130 milionë eurove, plus këtu edhe një reklamin të madh pa pagese nëpër të gjitha mediat botërore, pasi 25 Maji komentohet jo vetëm një dite por rreth dy javë me radhë, pasi dihet rëndësia e kësaj ndeshjeje të madhe.
Për këto arsye në Greqi prej kohësh nuk e kanë përtypur faktin që Shqipëria ka marrë një event të përmasave të tilla. Madje kritikat në media kanë qenë të ashpra, pikërisht për faktin sesi Federata greke nuk arriti të merrte të drejtën e organizimit të këtij eventi.
Por ata që nuk bënë atëherë, grekët po mundohen ta bëjnë sërish në këtë kohë, për të rikuperuar atë që humbën më parë. Madje qëllimit të tyre i vjen për shtat situata kaotike që po kalon futbolli shqiptar në muajt e fundit.
Gjithësesi një gjë duhet pasur parasysh. Shqipëria nuk mund ta humbë këtë rast të artë. Sepse më shumë se dëmi financiar, vendi do të merrte një goditje të fortë morale në imazhin e tij.
