Nga Boldnews.al
Komisioni i Pavarur i Kualifikimit (KPK) ka kërkuar informacion për ngarkesën e gjyqtarëve dhe prokurorëve.
Informacioni i kërkuar nuk përfshihet në kompetencat e strukturave të Vetingut, të cilat vlerësojnë kriteret e pasurisë, integritetit dhe aftësive profesionale të subjekteve.
Komisioni i Pavarur i Kualifikimi, prej fillimit të aktivitetit të tij, ka aplikuar shortin si mënyrën më transparente dhe të rregullt për përzgjedhjen e gjyqtarëve dhe prokurorëve që do të përfshiheshin sipas radhës në procesin e rivlerësimit.
Kërkesa e dërguar së fundmi nga KPK drejt organeve të qeverisjes së sistemit të drejtësisë për ngarkesën në punë të gjyqtarëve dhe prokurorëve duket se do të ndryshojë rregullin.
Natyrisht, do t’i japë procesit edhe nota subjektivizmi.
“Boldnews.al” nuk ka arritur të mësojë arsyen e kësaj kërkese të Komisionit të Pavarur të Kualifikimit.
Megjithatë, informacioni për ngarkesën e gjyqtarëve dhe prokurorëve, pritet t’i shërbejë Komisionit për të hartuar listën e “subjekteve prioritare” mes atyre që ende nuk kanë kaluar në procesin e rivlerësimit.
Bazuar në këtë kërkesë, me shumë mundësi, të parët e listës ende të pa-vetuar që do të përfshihen në procesin e rivlerësimit janë ata subjekte që kanë ngarkesë më të ulët pune.
Në rastin më të mirë, ky mekanizëm shkel parimin e procesit të rregullt dhe parimit të barazisë përpara ligjit.
Më të fituarit nga kjo “skemë e re” pritet të jenë gjyqtarët dhe prokurorët në Tiranë, të cilët, për shkak të specifikave, kanë volumin më të madh të punës.
Por, nga ana tjetër, janë po këta gjyqtarë e prokurorë, të cilët trajtojnë çështjet më të rëndësishme dhe impakt dhe me interes në sferën politike.
E, që natyrisht, janë më të prirur të respektojnë kërkesat, ndonjëherë edhe “tërësisht absurde” të personazheve me pushtet politik e ekonomik, në këmbim të qëndrimit (sa më gjatë), në detyrën e gjyqtarit apo prokurorit.
Shembujt janë të shumtë.
Gjyqtari i Tiranës, Besnik Hoxha, dënoi me gjobë redaksinë e “Boldnews.al” për “shpifje” ndaj Mirel Mërtirit mbi raportimet për “aferën e inceneratorëve”.
Ndërkohë, Komisioni Hetimor Parlamentar dhe veprimet e Strukturës së Posaçme Kundër Korrupsionit kanë faktuar se skema e inceneratorëve, përfshirë edhe personazhe si Mirel Mërtiri, janë përfshirë në korrupsion masiv.
Po ashtu, gjyqtari tjetër i Tiranës, Artan Gjermeni, i njohur për lidhjet e tij të forta me Partinë Socialiste, vendosi të pezullonte nga detyra Presidentin e Federatës Shqiptare të Futbollit, bazuar në një “urdhër politike” të kryetarit të bashkisë së kryeqytetit, Erion Veliaj.
Këta dy gjyqtarë, si edhe një pjesë e madhe e kolegëve që ndajnë të njëjtat korridore, nuk janë përfshirë ende në procesin e rivlerësimit, pavarësisht se Komisioni i Pavarur i Kualifikimit ka rreth 5 vjet që kryen funksionet e tij.
Sipas ‘skemës së re”, Besnik Hoxha, Artan Gjermeni e të tjerë, mund t’u shtyhet akoma më shumë përfshira në Veting, për shkak të “volumit të madh të punës”.
Nga ana tjetër, “skema e re” i hap shtegun dyshime të arsyeshme mbi abuzivizmin e mundshëm të Komisionit të Pavarur të Kualifikimit.
Nëpërmjet këtij sistemi, jo transparent do të forcojë dyshimet e ngritura edhe më herët se KPK “toleron” gjyqtarë e prokurorë të caktuar, duke ua shtyrë në kohë përfshirjen në procesin e rivlerësimit.
Raste të tilla, me emra konkretë, janë raportuar në mënyrë periodike nga “Boldnews.al”.
