Deputeti demokrat Agron Shehaj kërkoi dorëheqjen e Lulzim Bashës nga drejtimi i Partisë demokratikë.
Në një prononcim për gazetarët jashtë ambienteve të Kuvendit, deputeti i Tiranës tha se Lulëzim Basha duhet të largohet si kryetar i PD-së dhe ti japë demokratëve mundësi të bashkohen.
“Demokracia funksionon me votë, shumica tregoi se s’është me Bashën, duhet të largohet. Deri dje Basha dhe mbështetësit e tij përdornin argumentin se kishin shumicën, tani nuk e kanë më. Pakica ose të përshtatet, ose të largohet”, tha Shehaj, i cili bëri apel për bashkim të demokratëve.
Ai u pyet nga gazetarët edhe për zërat që kërkojnë largimin e Berishës nga PD. Për Agron Shehajn, Berisha duhet të largohet vetëm me votë.
“Kushdo që pretendon se Berisha duhet të largohet ka të drejtën e tij, le të mbledhë më shumë vota se Berisha dhe atëherë ai të largohet”, u shpreh Shehaj.
I pyetur nëse do të kandidojë për kryetar të Partisë Demokratike, ai u përgjigj: “Kur të hapet gara do flas”.
