Policia gjermane ka zhvilluar një operacion antidrogë, ku janë vënë në pranga disa persona, mes të cilëve edhe shqiptarë.
Mediat në Gjermani raportojnë se operacioni është zhvilluar për tetë muaj, duke ndërhyrë në total në 12 zona të shtetit gjerman, ku dyshohet se grupi shpërndante lëndë narkotike.
Sipas mediave, mësohet se hapat e para të bandës janë zbuluar nga autoritetet franceze, të cilët kanë dekriptuar programin Encrochat ku komunikonin trafikantët dhe pas 8 muaj hetimesh është bërë i mundur ndalimi i tyre.
Nga ky operacion u sekuestruan 12 kg kokainë me vlerë rreth 600 mijë euro, 3 kg marijuanë me vlerë rreth 30 mijë euro dhe 250 mije euro cash, ora e bizhuteri me vlerë, si dhe monedha floriri.
Gjatë kontrollit në banesën ku jetonin të arrestuarit është sekuestruar një Mercedes me vlerë 100 mijë euro dhe një Volvo me vlerë 40 mije euro. Këta të fundit u cilësuan si asete kriminale.
