Skuadra e Tiranës u shpall sot pasdite fituese e Kupës së Shqipërisë në volejboll për femra. Bardheblutë e trajneres Amarilda Prenga fituan 3-0 në finale ndaj Skënderbeut, ndeshje e luajtur në sallën e lojërave “Feti Borova” në kryeqytet.
Një hakmarrje e skuadrës së Tiranës për humbjen e pësuar në finalen e Ligës “Gjergj Kastrioti” pak ditë më parë. Madje ndeshja e sotme u dominua nga kryeqytetaset, ndjeshëm më superiore se rivalet korçare, që këtë herë çaluan shumë në parket.
Seti i parë u dominua nga Tirana, që fitoi pa probleme 25-15, ndërsa në të dytin loja është mjaft e fortë. Të dyja ekipet duelojnë fort, por në pikët shtesë bardheblutë fitojnë 28-26. Edhe në setin e tretë është Tirana që dominon dhe fiton 25-20, duke fituar krejt ndeshjen 3-0.
Një triumf i merituar për Tiranën, që festoi para tifozëve të saj këtë trofe, ndërsa Skënderbeu zhgënjeu në këtë ndeshje, duke mos arritur të japë atë që shpresonte.
