Kryeministri Edi Rama dhe kreu i LSI, Ilir Meta u takuan sot rreth orës 11:00 në zyrën e kryeparlamentarit në Kuvend. Takimi i dy drejtuesve të koalicionit vjen një ditë pasi Meta përmendi numrin “71 mandate” si shkak për vijimin apo ndërtimin e bashkëpunimit.
Pak minuta para Ramës, në zyrën e Metës ishte ministri Lefter Koka, një nga zërat që ka kritikuar fort policinë dhe kryebashkiakun e Durrësit, Vangjush Dakon. Ky i fundit, gjatë një aktiviteti ku ishte së bashku me ministrin Saimir Tahiri, i pyetur për akuzat e Kokës, tha se nuk merret me deklarata, por me punët e qytetit dhe se përgjigjen do ta japë në zgjedhje, raporton “Opimion”.
S’ka informacione në lidhje me bisedën e zhvilluar në zyren e kryetarit të Kuvendit.
Takimi vjen një ditë pasi Meta deklaroi se nëse PS-ja do të kishte 71 vota, LSI-ja do ishte në opozitë. Kurse paditen e së martës, Rama iu përgjigj për herë të parë provokimit të Ilir Metës për numrin 71 të mandateve. Burime brenda mbledhjes së kryesisë i cituan Top Channel thënien e kryeministrit, sipas së cilës, Partia Socialiste, PDIU dhe FRD e Bamir Topit, me votat e vitit 2013 dhe pa LSI, i kalojnë edhe sot 71 mandatet. Për Ramën, aleanca me LSI është për reformat dhe jo për numrat, një deklaratë që tenton të relativizojë 20 mandatet e Ilir Metës.
Sakaq seanca e nesërme parlamentare pritet të shoqërohet me debate, pas zhvillimeve të forta politike të ditëve të fundit.
Zhvillime që kulmuan me shkarkimin e Ylli Manjanit nga posti i ministrit të Drejtësisë.
