Qeveria franceze ka lajmëruar qytetarët e saj që të largohen nga Rusia.
Kërkesa vjen, për shkak se Parisi sheh rrezik nga “agravimi më tej i situatës në këtë shtet”. Franca thotë se qytetarët duhet të mos shkojnë në Rusi, nëse nuk kanë një punë “thelbësore”.
Edhe shtete të tjera kanë vënë në fuqi masa këshillimi të ngjashme për qytetarët e vet që jetojnë e punojnë në Rusi.
Ministria e Jashtme e Mbretërisë së Bashkuar “këshilloi qytetarët e vet, që të mos bëjnë asnjë udhëtim në të gjithë Rusinë” për shkak të vështirësive të largimit nga vendi dhe asaj që e përshkruan si “rritje e paqëndrueshmërisë” të ekonomisë ruse.
Të njëjtën gjë këshillon edhe Departamenti Amerikan i Shtetit. Ai citon faktorë të shumtë, duke përfshirë “potencialin për pasiguri ndaj qytetarëve amerikanë nga zyrtarë të sigurisë së qeverisë ruse”.
