Aktori i famshëm francez, Gerard Depardieu, ka qenë një nga personazhet e njohur perëndimor më të afërt me presidentin e Rusisë, Vladimir Putin, gjatë dekadës së fundit. Në vtin 2013, ylli i kinemasë vendosi që të bëhej shtetas rus, për të shmangur taksat në shtetin e tij, Francë.
Kur tensionet mes Rusisë dhe Ukrainës po rriteshin gjatë këtyre muajve të fundit, aktori i famshëm u shfaq në një televizion francez duke thënë: “Lëreni Vladimirin të qetë”.
Mesa duket, gjërat kanë ndryshuar tashmë pasi Depardieu ka ndërmarrë një hap befasues drejt prishjes së asaj miqësie të dashur. Gjatë një interviste me “Agence France-Presse”, ylli i kinemasë ka denoncuar luftën në Ukrainë.
“Rusia dhe Ukraina kanë qenë gjithmonë vende vëllezër”, tha Depardieu, duke shtuar: “Unë jam kundër kësaj lufte vëllavrasëse. Unë them ‘lini armët dhe negocioni’”.
Kujtojmë se, në vitin 2015, qeveria ukrainase e përfshiu Depardieu në një listë figurash kulturore që përbënin kërcënim për sigurinë e vendit. Madje mediat ukrainase e lidhën vendimin me komentet që Depardieu kishte bërë duke vënë në dyshim pavarësinë e Ukrainës. Në vitin 2014, në festivalin e filmit Baltic Pearl në Letoni, Depardieu u tha gazetarëve se ai e donte Rusinë dhe “Ukrainën, e cila është pjesë e Rusisë”.
