Presidenti francez Emmanuel Macron bëri me dije se ai foli me Vladimir Putin të Enjten në mbrëmje me kërkesë të presidentit ukrainas Volodymyr Zelenskiy.
Duke folur në fund të një samiti urgjent të liderëve të BE-së në Bruksel, kushtuar luftës së Rusisë kundër Ukrainës, Macron tha se telefonata me presidentin rus kishte qenë “e sinqertë, e drejtpërdrejtë dhe e shpejtë”.
Macron tha se ai bëri thirrjen, në emër të Zelenskiy, për t’i kërkuar Putinit të ndalonte luftimet dhe të bisedonte me presidentin ukrainas, i cili nuk kishte mundur të kontaktonte me liderin rus.
Putin ka refuzuar vazhdimisht të angazhohet drejtpërdrejt me presidentin Zelenskiy.
“Nuk solli asnjë rezultat”, tha Macron për telefonatën, “presidenti rus ka zgjedhur luftën”.
Duke iu referuar telefonatës, ai shtoi: “Është përgjegjësia ime të ndërmarrë iniciativa të tilla kur ato kërkohen nga Ukraina … Edhe pse ne dënojmë dhe sanksionojmë dhe vazhdojmë të vendosim të veprojmë, ta lëmë këtë rrugë të hapur…”
Kremlini tha se Putini i kishte dhënë një shpjegim “shterrues” Macronit për arsyet e veprimeve të Rusisë në Ukrainë.
Nga ana tjetër, raportohet se Presidenti i SHBA Joe Biden tha më herët gjatë ditës se ai nuk kishte plane të fliste me Putinin.
