Lazio është jashtë Europa League në fazën playoff. Në ndeshjen e kthimit ndaj Portos në “Olimpico”, bardhekaltërit duhej të përmbysnin humbjen e parë 2-1 në Oporto por sot barazuan 2-2 përballë ekipit të Sergio Conceicaos.
Vendasit kaluan të parët në avantazh me Immobile teksa menjëherë më pas Taremi barazoi me penallti në 31’. Gjithsesi duhet thënë se Porto krijoi shumë raste dhe vetëm në pjesën e parë, Strakosha që ishte titullar bëri disa super pritje. Në pjesën e dytë Porto u tregua më konkret dhe shënoi edhe golin e dytë duke shuar shpresat për kualifikimin në çerekfinale edhe pse Lazio realizoi golin e barazimit 2-2 në sekondat e fundit të sfidës.
Atalanta e Gjimshitit ndërkohë shkëlqeu në Greqi teksa sistemoi Olympiacos me rezultatin 3-0 dhe mbrojtësi kuqezi ishte i padiskutueshëm. Në pjesën e parë shënoi Maehle në 40’ teksa në pjesën e dytë ishte Malinkovsky që realizoi dopietë dhe ndërkohë shfaqi dhe mesazhin “Jo luftës në Ukrainë”, duke qenë dhe vet nga ai shtet.
Në sfidat e tjera, Sevilla kaloi në çerekfinale pa probleme edhe pse u mund 1-0 në Kroaci nga Dinamo e Zagrebit pasi kishte fituar 3-0 sfidën e parë. Një duel tjetër interesant ishte Sociedad-Leipzig ku gjermanët morën më të mirën dhe fituan 3-1 teksa dueli i parë kishte përfunduar 2-2.
