Një raport i fundit i Bankës Botërore tregoi se popullsia e Shqipërisë në moshë pune vazhdon të tkurret, pasi njerëzit po emigrojnë në kërkim të mundësive më të mira të punës. Shkaqet e emigracionit renditën papunësia dhe pagat e ulëta në vendit tonë.
Shqetësimi për largimin e shqiptarëve është shprehur herë pas herë vitet e fundit, i pasqyruar dhe nga sondazhet e enteve ndërkombëtare.
Vetë Rama, është justifikuar duke u shprehur se emigracioni nuk ndodh dhe në Shqipëri, por prek dhe vendet e tjera në Botë e Rajon.
Por çfarë deklaronte ai para se të vinte në pushtet? Së fundmi, në rrjetet sociale është shpërndarë një video që tregon qëndrimin e kryeministrit për temën para dhe pasi të ulej në karrigen e kreut të qeverisë.
Në vitin 2013, gjatë fushatës elektorale, Rama do të shprehet: “Nga Shqipëria ikin çdo ditë 130 vetë. Pse ikin këta nga kjo parajsë e punës dhe e punësimit?! Ça shkojnë të gjënë atje? Shqiptarët e dinë se në Greqi nuk ka punë, as në Itali nuk ka punë! Madje shumë nga ata që e kanë një punë atje e humbin dhe kthehen këtu në rreshtin e papunësisë në shtëpinë e tyre. E pra, ikin sepse nuk jetojnë dot”.
Ndërkohë, nga posti i kryeministrit, për problematikën do të fliste ndryshe: “Kush thotë se ikja e njerëzve sot, nga Shqipëria, lidhet me qeverisjen nuk kupton asnjë gjë. Se nuk kupton asnjë gjë, ose është i poshtër”.
