Sot ka nisur zyrtarisht fushata për zgjedhjet e pjesshme vendore që do të mbahen në 6 bashki, për zgjedhjen e kryebashkiakëve, ku përfshihet edhe Lushnja.
Indrit Sefa, i cili garon me siglat e PD të drejtuar nga Lulzim Basha, ka ftuar në një debat rivalët e tij në garën për Kryebashkiak, Elton Bano nga koalicioni “Shtëpia e Lirisë” dhe Eriselda Sefa që garon për socialistët.
“Në 6 Mars, ju do të shkoni në qendrat e votimit për të vendosur se kush do të drejtojë Bashkinë e Lushnjës. Vërtet këto zgjedhje janë vetëm për 1 vit nga mandati i mbetur, por ato kanë shumë rëndësi.
Në ditën e parë të nisjes së fushatës zgjedhore, ftoj çdo votues në Lushnje të marrë pjesë në zgjedhjet e 6 Marsit, duke na dhënë shansin që të bëjmë realitet ndryshimin!
Një thirrje të veçantë kam për bashkëmoshatarët e mi. Merrni pjesë masivisht në këto zgjedhje! Lushnja ka nevojë për secilin prej nesh”, tha Indrit Sefa në mesazhin e tij.
Ai u shpreh se në funksion të një fushate qytetare dhe për të treguar se për ne të rëndësishëm janë lushnjarët dhe jo pushteti, ftoj rivalen time, kandidaten e Partisë Socialiste që të zhvillojmë një debat publik për planin e secilit prej nesh për Lushnjën. Sefa shprehet se në këtë debat është i mirëpritur të marrë pjesë edhe kandidati tjetër. Megjithëse përfaqëson 2 parti të vogla, kushdo duhet të ketë garancitë për një garë të barabartë.
Ndërkohë, Taulant Balla me cilësinë e drejtuesit politik të fushatës për Lushnjen, ka zhvilluar një takim me qytetarët në Lushnje në mbështetje të kandidates për kryetare të bashkie, Eriselda Sefa.
Balla u bëri thirrje qytetarëve që të mos e çojnë votën e tyre dëm, por të bashkohen me PS në mbështetje të Eriseldës.
Balla nuk i kurseu kritikat ndaj kreut të PD, ish-kryeministrit Sali Berisha dhe Presidentit Ilir Meta, ndërsa theksoi se i kanë humbur të gjitha mundësitë dhe se nuk kanë asnjë mundësi të dëmtojnë Shqipërinë.
“Unë të enjten në parlament i pashë bashkë. Unë me Saliun gjysma e grupit të Lulit bërtiste për Saliun, bashkë janë. Unë jam krenar që këtij qyteti i kemi propozuar një vajzë me një eksperiencë shumë të shkëlqyer. Kemi rënë të gjithë dakord të mbështesim Eriseldën. Të gjithë kanë investuar besimin e tyre tek një vajzë që shkallët e karrierës i ka ngjitur hapa pas hapi. Bashkëqeverisja jonë me njerëzit e thjeshtë është e vetmja aleancë që kemi. Aleanca vetme e PS janë njerëzit, kurse aleanca e tyre e ka humbur davanë që në 2013 dhe nuk ka shans që të rikthehen dhe ti bëjnë dëm Shqipërisë”, tha Balla.
Ndërkohë kandidati i koalicionit “Shtëpia e Lirisë” në ditën e parë zyrtare të fushatës, Elton Bano, ka programuar takime me qytetarët. i renditur i treti në fletën e votimit, Bano ka kërkuar që lushnjarët, ta votojnë për kryebashkiak, dhe të bëhen pjesë e ndryshimit të madh.
“Meritokracia dhe demokracia duhet ti kthehet përsëri qytetarëve ndaj votoni për të ardhmen e fëmijëve tuaj, për ata të cilët do ta zhvillojnë Lushnjen.
Do të mbështesim dhe do të mbrojmë të gjithë punonjësit dhe të vetëpunësuarit.
Çdokush që ka të drejtën e votës, duhet të marrë në dorë fatin e qytetit.
Ndryshimi do vij në 6 Mars nga qytetarët e Lushnjes”, është shprehur Bano.
