Golat nuk kanë të ndalur në “Loro Boriçi” në sfidën mes Vllaznisë dhe Teutës. Vendasit kryesojnë me rezultatin 3-1 në një ndeshje që ka nisur vrullshëm.
Fillimisht për shkodranët shënon Latifi pas një aksioni të shpejtë me një gjuajtje nga jashtë zonës që kalon Qirkon.
Vetëm 51 sekonda lojë për golin e parë ndërsa në minutën e 7-të, shkodranët dyfishuan shifrat pas një goditje nga këndi. Dianje është i vëmendshëm në shtyllën e dytë për të dërguar topin në rrjetën e durrsakëve.
Vllaznia realizoi edhe golin e tretë në minutën e 16-të. Gjurgjeviç niset në krahun e djathtë dhe pasi merr fundoren, harkon në zonë ku Latifi me kokë shënon dygolëshin personal.
Ndërkohë vetëm disa sekonda më vonë, Teuta shkurton diferencat me anë të Hebaj-t. Sulmuesi shënon pas një kundërsulmi të shpejtë që gjen të pavendosur mbrojtjen shkodrane.
