Deputeti Belind Këlliçi, i pranishëm në takimin prezantues të kandidatit të koalicionit “Shtëpia e Lirisë”, Premtim Kryemadhi, u shpreh sot se më 6 mars, dibranët me votën e tyre do ia kthejnë qytetarëve Bashkinë.
Duke iu referuar bisedës që kishte bërë me një të moshuar, Këlliçi tha “me të vërtetën, Botës i bie vërdallë, ndërsa me gënjeshtrën nuk bën dot asnjë hap. Ne jemi me të vërtetën, ndaj dhe ju na mbështesni, dhe kudo ku ne shkojmë gjejmë mbështetjen dhe entuziazmin e shqiptarëve”.
“Lulzim Basha nuk i realizoi për 8 vite primaret. Selia e demokratëve kontrollohet nga Edi Rama, për fat të keq, dhe çfarë bëjnë, sulmojnë kandidatët tanë, duke thënë se kandidatët tanë nuk kanë lidhje me PD. Premtim Kryemadhi është themelues i PD, është dibran dhe askush nuk mund të na thotë se kandidatët tanë nuk kanë lidhje me demokratët.
Edi Rama garon në 6 mars me dy sigla, një të PS dhe tjetrën që e ka marrë peng dhe e kontrollon. Por me 6 mars ne do të fitojmë jo vetëm në Dibër dhe do ti japim një mesazh jo vetëm Edi Ramës, por edhe atyre që mbajnë peng selinë dhe logon e PD”, tha Këlliçi.
Sipas tij, pas 6 marsit, betejën e kemi me Edi Ramën, të cilin duhet ta largojmë një orë e më parë nga qeverisja e vendit, pasi ka boshatisur jo vetëm Dibrën, por edhe Shqipërinë.
