Thomas Brdaric doli në konferencën e zakonshme për shtyp, në prag të sfidës me Teutën në “Loro Boriçi”, teksa deklaroi se kuqeblutë kanë një plan për të mposhtur kundërshtarin dhe theksoi se gara për titullin kampion nuk është mbyllur ende.
Sa e rëndësishme është përballja nesër me Teutën?
Për ne është një mundësi shumë e mirë të vazhdojmë serinë e fitoreve, pas suksesit ndaj Flamurtarit në mesjavë në Kupën e Shqipërisë. Duhet të shfrytëzojmë faktin që luajmë në shtëpi dhe mendoj se kemi përgatitur një plan të mirë ndeshjeje për nesër, duke qenë se e dimë si luan ekipi kundërshtar. Kemi dëshirë t’u shkaktojmë humbje këtu.
Kundërshtari po kalon një moment të vështirë në kampionat dhe kjo mund të jetë një favor për Vllazninë…
Ne marrim seriozisht çdo kundërshtar, pasi kështu është Superliga dhe nuk të lejohen nënvlerësimet. Jemi në gjendje shumë të mirë dhe besoj se do t’ia dalim më së miri.
Te Teuta nuk do të jetë miku juaj, Edi Martini në pankinë, por një trajner i ri…
Me trajnerin Edi Martini kam një marrëdhënie shumë të mirë dhe shpresoj që rikthehet shumë shpejt në pankinë, pasi është shumë i zoti. Teuta ka një trajner tjetër, i cili ka qenë edhe në ndeshjen e kaluar në Elbasan, por unë mendoj vetëm për gjendjen e ekipit tim.
A do të keni grupin e plotë për nesër?
E kam thënë gjithmonë, që ne nuk kemi vetëm 11 lojtarë, pasi të gjithë kanë mundësitë e tyre të tregojnë veten. Jam shumë i kënaqur që Jonuzi është gati, pasi është i rëndësishëm për ekipin, megjithatë të gjithë kanë shansin e tyre të tregojnë veten në stërvitje për të marrë më shumë minuta.
A prisni zhbllokimin e sulmuesve nesër?
Nuk ka rëndësi kush shënon, pasi vlen të jemi gjithmonë në balancë. Sigurisht që urojmë të shënojnë sulmuesit, pasi u duhet të gjejnë vetëbesimin, megjithatë më e rëndësishme është të marrim maksimumin në çdo ndeshje.
Ndoshta është momenti që “Loro Boriçi” të mbushet nesër?
Shpresoj që jo vetëm zoti i motit, por edhe ai i futbollit të jetë me ne nesër dhe të marrim fitoren. Uroj gjithashtu që tifozët të jenë të shumtë në numër, si gjithmonë në stadiumin tonë.
A mund të themi se gara për titullin është e mbyllur?
Tirana është një ekip shumë efektiv, që ka arritur të marrë maksimumin në ndeshjet e saj, duke shfrytëzuar rastet. Megjithatë edhe ne kemi një ekip shumë të mirë, ndaj duhet të përqendrohemi te ajo që bëjmë në fushë, pa parë rezultatet e të tjerëve. Tirana është shkëputur shumë, por kemi ende shumë javë përpara dhe objektiva në lojë.
