Presidenti i Shteteve të Bashkuara të Amerikës, Joe Biden i ka kërkuar homologut serb, Aleksandar Vuçiç, njohjen e Kosovës, si finale të dialogut për normalizimin e marrëdhënieve.
Kërkesa erdhi të shtunën, bashkë me urimin për 15 Shkurtin, Ditën e Shtetësisë së Republikës së Serbisë.
“Aspiratat e Serbisë drejt Bashkimit Evropian varen edhe nga progresi drejt normalizimit të plotë të marrëdhënieve ndërmjet Beogradit dhe Prishtinës, i cili, siç e dini, besoj se duhet të bazohet në njohjen reciproke”, i shkroi Biden Vuçiçit, duke e garantuar se “Shtetet e Bashkuara janë të gatshme ta mbështesin me mirëbesim për ta arritur këtë qëllim”.
Sipas Presidentit Biden, “familja evropiane nuk do të jetë e plotë pa Serbinë dhe të gjithë fqinjët e saj”.
