Një shqiptar i shumëkërkuar nga drejtësia është arrestuar në Itali, ndërsa ishte pjesë e një bande grabitësish, që vepronin në veriun e Italisë dhe Trentino.
Edison Pula, i dënuar me 20 vite burg, i cili është arratisur nga Komisariati i Policisë në Fushë Krujë, në 22 dhjetor të vitit 2016, është arrestuar në Itali, ku prej 5 vitesh ka jetuar i qetë, edhe pse ishte përfshirë në një aktivitet kriminal.
Pula është arrestuar së bashku me një shqiptar tjetër, Imer Masha, edhe ky nga zona e Fushë Krujës.
Policia italiane ka verifikuar të dhënat e tyre biometrike kanë zbuluar se i arrestuari ishte një person i rrezikshëm, i dënuar me 20 vite burg për një atentat me eksploziv ndaj ish-policit Gentjan Bejtja ngjarje e ndodhur në Larushk dhe ku ish-polici ngeli i plagosur rëndë.
Kush është Edison Piula dhe arratisja e tij nga burgu:
Edison Pula, anëtar i bandës së Niklës, i akuzuar për atentatin me eksploziv ndaj Gentjan Bejtjes në Larushk dhe për një sërë veprash të tjera penale. Edhe pse i prangosur dhe nën masa të rrepta sigurie 21-vjeçari në momentin që zbriti nga furgoni, mundi t’i shpëtojë policëve.
Ai ka kapërcyer murin rrethues, duke u larguar në drejtim të paditur. Arratisja ndodhi gjatë kohës së transferimit të tij nga stacioni i policisë së Fushë Krujës në të Krujës.
Uniformat blu ngritën postblloqe në rrugët kryesore dhe në të gjithë zonën për të kapur 21-vjecarin. Burime nga policia bëjnë të ditur se dy policët që e shoqëronin u treguan të pakujdesshëm dhe janë ndaluar me pas nga kolegët e tyre.
Mbi Edison Pulën rëndojnë disa vepra penale si: ‘Vrasje me paramendim e ngelur në tentativë’, ‘Shkatërrim i pronës me eksploziv’, ‘Vjedhje me dhunë’ dhe ‘Prodhim dhe mbajtje e armëve dhe municioneve luftarake’.
Pula u prangos në 21 dhjetor sëbashku me 8 anëtarë të tjerë të së njëjtës bandë. Sipas policisë ai është pjesëtar i grupit kriminal që organizoi atentatin ndaj Gentjan Bejtjes në fshatin Larushk të Krujës.
