Trajneri i Partizanit, Dritan Mehmeti, e ka cilësuar suksesin e sotëm shumë të rëndësishëm. Por ai thekson se nuk është një fitore që do të shënojë kthesën e të kuqve. Në “SuperSport” ai deklaroi pas sfidës se vetëm nëse ekipi do të fitonte ndeshje radhazi, do të quhej në rrugën e duhur në këtë sezon.
“Besoj se skuadra ka fituar një ndeshje kundër një kundërshtari që e kishim vlerësuar në maksimum e që të imponon respekt. Skuadra duhet të ketë shumë ekuilibër, kjo fitore të jep entuziazëm e moral, edhe në ndeshjet e tjera kemi krijuar, ishim të qartë para portës. Duke pasur parasysh ndeshjen, në pjesën e parë kemi pasur edhe më tepër mundësi, por duhet të jemi të kujdesshëm se në këto rezultate duhet të motivosh skuadrën kur je 2-0 përpara se me një gol futet në lojë kundërshtari.
Duhet të jemi me këmbë në tokë, duhet të shohim ndeshjen e radhës se duhet të dalim nga kjo gjendje me punë dhe jo duke menduar se kemi bërë gjithçka. Kemi ndeshje të vështirë në kupë me Dinamon, janë të rëndësishme rezultate pozitive, por edhe mënyra se si duhet ta menaxhojmë se në 10 ditë kemi 3 ndeshje që janë shumë të vështira.
Kanë qenë në një ditë të mirë të gjithë sulmuesit. Do të doja të ishin në ditë të mirë në ndeshje të ndryshme, por sot ishin të tre në gjendje të mirë. Kemi pasur shumë probleme sa i përket mënyrës së si sulmonim, në Laç luajtëm mirë edhe pse kishim mungesa. Për mua të gjithë janë të rëndësishëm se duhet të rritemi gradualisht për të arritur atë që meriton Partizani.
Duhet që kur të kesh mundësi, të bësh taktikën në varësi të elementëve që ke dhe kundërshtarit. Ne e kishim menaxhuar shumë mirë në këtë aspekt, për të gjetur hapësirat se kemi cilësi në vijën e parë të sulmit me lojtarë të shpejtë dhe kërkojmë vertikalizimin.
Nuk mund të vijë me një ndeshje pika e kthesës e skuadrës që ka kaluar shumë tranzicione, por duke parë mënyrën se si janë luajtur ndeshjet. Por kemi krijuar me Kastriotin e Dinamon shumë raste, edhe me Laçin. Ne duhet të rritemi gradualisht dhe të arrijmë një fizionomi loje që të dominojmë kundërshtarin se i kemi mundësitë. Por kjo vjen dita-ditës duke pasur ekuilibër dhe duke i fituar ndeshjet njëra pas tjetrës.
Në merkaton e janarit nuk ke shumë mundësi zgjedhje, mund të luash 50 me 50 sa i përket elementëve. Skuadra e ka forcën nga brenda, edhe disa elementë kanë ardhur, skuadra duhet të bëjë mirë, duhet të sinkronizohet. Ne duhet të shohim gjërat gradualisht që të rritemi gradualisht”, tha Mehmeti.
