Bayerni i Mynihut është në vendin e parë në renditjen e Bundesligës me 6 pikë më shumë se Borussia Dortmund dhe në Champions League ka arritur të marrë 6 fitore në 6 takimet që zhvilloi në fazën e grupeve të turneut.
Ndodh që edhe klubi gjerman të humbasë dhe të kalojë momente të vështirë, që sjellin edhe tension. Ndonjëherë nuk arrin të flesh për shkak të punës apo mendimeve negative dhe kjo i ka ndodhur edhe teknikut Julian Nagelsmann:
“Ndonjëherë, pas ndonjë ndeshjeje, thërras emrat e lojtarëve të mi në gjumë. Më tha gruaja njëherë, sepse ndodh shpesh që ta zgjoj gjatë natës”, ka thënë tekniku gjerman në një intervistë.
“Kur humbasim ndonjë ndeshje, fjalë e parë që më vjen në mendje është turp. Po, më vjen turp. Një humbje më peshon për disa ditë, por pjesa më e vështirë është të qëndrosh optimist edhe kur humbet”, ka përfunduar Nagelsmann.
