Partia Demokristiane e Nard Ndokës do të jetë pjesë e koalicionit “Shtëpia e Lirisë”.
PDK, bashkë me LSI-në dhe Komisionin e Rithemelimit, do të garojnë për zgjedhjet e pjesshme të 6 Marsit me kandidatët fitues të primareve të së Dielës.
Nard Ndoka tha për “BoldNews.al” se “do mbështeten të gjithë kandidatët, por në Shkodër besojmë se do të japim kontributin më të madhe”.
“Vlerësojmë procesin e primareve për përzgjedhjen e kandidateve, ku anëtarësia për herë të parë shprehu vullnetin me votën e saj”, shtoi ai.
I pyetur se “a ka frikë mos shpallet non grata”, Ndoka u shpreh se përderisa do të jetë pjesë e koalicionit, s’ka pse të ketë frikë.
LSI ka dërguar në KQZ këtë të Martë kërkesën për regjistrim të koalicionit zgjedhor të quajtur “Shtëpia e Lirisë.” “Partia Lëvizja Socialiste për integrim si parti udhëheqëse e koalicionit, i kërkon Komisionit Qendror të Zgjedhjeve regjistrimin e koalicionit zgjedhor për zgjedhjet e pjesshme vendore të datës 6 mars 2022. Emri i koalicionit është ‘Shtëpia e Lirisë’. Partitë përbërëse të koalicionit janë LSI, Partia Demokratike e Shqipërisë-Komisioni i Përkohshëm i rithemelimit dhe Partia Demokristiane”, thuhet në dokument.
Sot, u publikua dhe logo me të cilën koalicioni do prezantohet në zgjedhjet e pjesshme që zhvillohen në 6 bashki: Dibër, Shkodër, Lushnje, Rrogozhinë, Durrës dhe Vorë.
