Sot përfundon afati për regjistrimin e partive në zgjedhjet e pjesshme vendore të 6 marsit. Partitë kryesore e kanë çuar tashmë kërkesën për t’u regjistruar për zgjedhjet pranë Komisionit Qendror të Zgjedhjeve, por ende nuk është regjistruar komiteti nismëtar për kandidatë të pavarur.
Ky regjistrim është me interes për shkak se kandidatët e dalë nga primaret e zhvilluara një ditë më parë nga Komisioni i Rithemelimit mund të vendosin të regjistrohen si kandidatë të pavarur. Skadimi i këtij afati sot do të zbulojë kësisoj edhe mënyrën sesi do të kandidojnë 6 kandidatët e zgjedhur një ditë më parë. Mbetet ende në lojë mundësia për t’u regjistruar si kandidatë të partive të koalicionit opozitar.
Pas skadimit të afatit të sotëm, KQZ merr në shqyrtim kërkesat dhe brenda 24 orëve komisioneri bën regjistrimin e tyre dhe pas 24 orësh të tjera regjistrohen edhe kandidatët. Prandaj në datën 2 shkurt, datë kur do të regjistrohen edhe koalicionet zgjedhore do të kuptohet edhe formula që do të ndjekë opozita. Pavarësisht krizës brenda Partisë Demokratike, shumë zëra brenda opozitës kanë bërë thirrje që të dilet me një kandidat të vetëm, për të maksimalizuar votat.
Por ndërsa Komisioni i Rithemelimit ka publikuar tashmë emrat e kandidatëve, Basha ende nuk e ka bërë një gjë të tillë, duke vijuar traditën e publikimit të listave në kufijtë kohorë të regjistrimit. Nga ana tjetër, PS ka publikuar emrat e kandidatëve për 5 bashki, ndërsa të martën ka njoftuar se do të bëjë të ditur edhe emrin e kandidatit për Lushnjën.
Më 6 mars, do të zhvillohen zgjedhje të pjesshme lokale në bashkitë, Shkodër, Durrës, Dibër, Vorë, Rrogozhinë dhe Lushnjë.
