Konflikti Bashki e Tiranës dhe FSHF, përkatësisht me Armando Dukën si president i kësaj federate, po njeh nivele të reja përballje.
Bashkia e Tiranës e akuzon sot presidentin e FSHF si i korruptuar. Ndërkohë Duka ka vendosur kandidaturën për zgjedhjet e datës 2 mars 2022 për president në Federatën Shqiptare të Futbollit, çka duket nuk ka pëlqimin e qeverisë.
Dosja sipas Bashkisë së Tiranës, si aksionere e klubit “Tirana”, do ti niset edhe EUFA, DEA, Stotland Yard dhe SPAK.
Federata e Futbollit ligjërisht është e ndarë nga shteti, por me sa duket kjo dosje e Erion Veliajt do të përfundojë në SPAK.
Burime nga Bashkia e Tiranës konfirmojnë se, prej dy javësh, një skuadër juristësh shqiptarë, amerikanë dhe britanikë po asistojnë aksionerin e Tiranës në një dosje voluminoze shkeljesh, për t’ia prezantuar FBI, DEA, NCA, Scotland Yard, SPAK, Prokurorisë së Tiranës, Krimit Ekonomik, Agjencisë së Pastrimit të Parave, AMA, Hetimit Tatimor, AKU, si dhe ambasadave Amerikane e Britanike në Tiranë, shkruan balkanweb.com.
Çështjet e shitjeve ndërkombëtare të ndeshjeve dhe basteve të paracaktuara do t’i paraqiten oficerëve rajonalë të FBI. Kujtojmë se agjentët amerikanë çuan në rrëzimin e Blatter e Platini – miqtë “e pathyeshëm të Dukës”, që mbyllën me dënime penale karrierat e tyre!
Sipas burimeve, agjentet e DEA me qendër rajonale në Athinë – agjencia amerikane e antidrogës – do të prezantohen me të gjitha provat e parave të drogës në sport, me dijeni e mbështetje të Armando Dukës me elementë të botës së krimit në Shijak e vende të tjera të Europës e Amerikës Latine, shkruan balkanweb.com.
Nuk mbetet pas dosja britanike, për të dhëna të burimeve dhe shpenzimeve të pajustifikuara të familjes Duka në blerje pronash, makinash luksoze e asetesh në shifra të jashtëzakonshme. Scotland Yard dhe NCA, që gjurmon posaçërisht pastrimin e parave nga subjektet e huaja në Britaninë e Madhe, do të kenë të hënën prova të pakundërshtueshme sipas aksionerëve të Tiranës.
Pak ditë më parë nga ana e Federatës u hodhën akuza në drejtim të Bashkisë, lidhu me tentativat për manipulimin e zgjedhjeve në FSHF.
Shoqata Rajonale e Futbollit Tiranë ka dërguar në FIFA një letër ankimuese për ndërhyrjet në fushatën e zgjedhjeve në FSHF dhe kërcënimet e vazhdueshme që ka marrë nga Bashkia e Tiranës dhe kryetari i saj, Erjon Veliaj.
Në letrën drejtuar FIFA-s, shoqata rajonale e Tiranës denoncon, se procesi i zgjedhjeve është nën një kërcënim serioz për shkak të ndërhyrjes agresive të politikës dhe segmenteve të krimit.
“U bënë disa javë që anëtarët tanë janë detyruar të marrin pjesë në mbledhje me kryetarin e Bashkisë Tiranë Erion Veliajn dhe drejtorin e sporteve në Bashki Gjergji Muzakën, duke u diktuar atyre kandidatin e preferuar, përndryshe do të përballen me masa si humbja e punës dhe me pasoja të rënda, nëse nuk bëhet “zgjedhja e duhur”.
Me afrimin e zgjedhjeve në Tiranë, që do të mbahen më 24 janar të vitit 2022, presioni ka ardhur në rritje duke sjellë nga ambientet e Bashkisë për takime individuale anëtarë të Shoqatës Rajonale Tiranë, Sulejman Adili, Endrit Agushi, Eugen Kruja, Xhek Alushi, Mirel Harizaj, Akil Jakupi dhe Indrit Myrtja. Kërkesa e kryetarit Veliaj është e drejtpërdrejtë: bëni zgjedhjen e duhur për të shmangur probleme në të ardhmen”, thuhej në deklaratë.
