Është mbyllur në barazim pa gola pjesa e parë mes Tiranës dhe Vllaznisë, e vlefshme për javën e 16-të të Superiores.
Ndeshja nisi me probleme teksa një fishekzjarr i hedhur nga tifozët e Vllaznisë plas afër vijërojtësit Ridiger Çiokaj dhe ky i fundit ka nevojë për asistencën e stafit mjekësor të Vllaznisë.
Rasti i parë për gol erdhi në minutën e 17-të dhe i takon shkodranëve. Pas një goditje nga këndi, Aralica është i vetëm në zonë dhe gjuan me kokë i pashqetësuar, por dërgon sferën mbi traversën e portës së Bekajt.
Në minutën e 31-të, pas një goditje nga këndi, një tentativë e Limajt devijohet nga një futbollist i Vllaznisë dhe bardheblutë pretendojnë për prekje të topit me dorë. Por Jorgji lejon lojën të vazhdojë.
Fundi i 45 minutave tw para foli për shkodranët. Aralica humb mundësi të pastër shënimi teksa shfaqet i vetëm para Bekajt. Sulmuesi gjuan por gjen përgjigjen e portierit të Tiranës.
Tjetër mundësi e artë e Vllaznisë kur një gjuajtje e Krymit përfundon jashtë, jo shumë lart traversës së portës së Bekajt.
