Teksa disa zona janë përfshirë nga reshjet e dëborës, Autoriteti Rrugor Shqiptar ka dhënë informacion për të gjithë drejtuesit e automjeteve mbi gjendjen e rrugëve në akset më të vështira.
Autoriteti Rrugor Shqiptar u bën thirrje shoferëve që të ecin me kujdes dhe të jenë të pajisur me goma dimërore dhe me zinxhirë në Kukës, duke shtuar se aksi i Urës së Zapodit-Shishtavec ka pasur më shumë probleme në qarkullim .
Po ashtu, disa fshatra në Lezhë kanë pasur probleme me furnizimin me energjinë elektrike si pasojë e erës së fortë që ka përfshirën zonën. Era e fortë ka dëmtuar disa linja dhe shtylla elektrike, duke lënë në errësirë dhe pa ngrohje disa fshatra në Zejmen dhe Kolsh të Lezhës.
Moti i keq ka përfshirë edhe qarkun e Dibrës duke sjellë probleme të shumta edhe me furnizimin me energji elektrike të disa fshatrave. Ndërsa prej më shumë se 72 orësh të gjithë fshatrat e Njësisë Administrative Zall-Dardhë në Bashkinë e Dibrës janë në errësirë totale.
