Gazeta greke “Protothema” ka analizuar në një shkrim të sajin zhvillimet politike në Shqipëri, ku vëmendjen kryesore e merr përplasja që po ndodh në PD mes ish-Kryeministrit Sali Berisha, i mbështetur nga demokratët, dhe Lulzim Bashës, kryetari i shkarkuar nga Kuvendi i 11 dhjetorit dhe referendumi i anëtarësisë më 18 dhjetor.
Media greke shkruan se Edi Rama po forcon mbretërimin e tij në Shqipëri, pas përplasjeve në Partinë Demokratike.
Ish-kryeministri Sali Berisha ka thënë se është i vendosur të vazhdojë luftën e tij “të pamëshirshme” kundër kreut të Partisë Demokratike të Shqipërisë, Lulzim Basha, pas largimit të tij nga partia që ai themeloi në vitin 1990.
Përmbysja e Berishës – themelues dhe kryetar i PD-së prej 23 vitesh, dy herë kryeministër dhe president i Republikës – është rezultat i një konflikti të ashpër të brendshëm me kryesinë aktuale të partisë, e cila e konsideron atë një “peshë” pas sugjerimet e Shteteve të Bashkuara.
Pas një mbledhjeje maratonë të Kryesisë së thirrur nga Basha, Berisha dhe tetë zyrtarë të lartë, të cilët më parë kishin sfiduar legjitimitetin e Lulzim Bashës, u përjashtuan nga partia, duke privuar nga të drejtat edhe anëtarët e thjeshtë. Mes të përjashtuarve nga partia janë edhe ish-presidenti shqiptar Bujar Nishani dhe ish-ministri i Brendshëm Flamur Noka. Gjithashtu u hoqën edhe 20 deputetë që kishin dalë në krah të Berishës.
“Prerja e kokës” e Berishës dhe mbështetësve të tij erdhi tre ditë pas demonstratave kundër Bashës, me incidente të rënda në selinë e partisë, kur mbështetësit e ish-kryeministrit tentuan t’a merrnin me dhunë. Për shkak të situatës së tensionuar policia ka ndërhyrë me gaz lotsjellës dhe ujë.
Ndonëse Basha u zgjodh kryetar i Partisë Demokratike në vitin 2013 me “bekimin” e paraardhësit të tij, Sali Berisha, marrëdhënia e tyre është acaruar rëndë së fundmi, pasi ish-kryeministri përkufizohet nga SHBA si një politikan “i korruptuar”.
Majin e kaluar, Sekretari Amerikan i Shtetit Anthony Blinken njoftoi ndalimin e udhëtimit të Sali Berishës dhe anëtarëve të familjes së tij, duke cituar informacione dhe akuza se ish-kryeministri ishte i përfshirë në korrupsion, ndërhyrje publike dhe abuzim me pushtetin.
Pak para se opozita të kthehej në parlament në shtator, pas një mungese dy vjeçare, Lulzim Basha njoftoi largimin e Berishës, duke e akuzuar atë për korrupsion dhe veprime që “minuan demokracinë në Shqipëri”. Themeluesi dhe kryetari i Partisë Demokratike për gati dy dekada, u përjashtua nga Grupi Parlamentar, vendim që u pasua me reagimin e tij të ashpër.
Megjithatë, raportet e gazetave shqiptare flasin për “presion” të fortë që Basha ka marrë nga ambasada amerikane në Tiranë, për të vijuar me “prerjen e kokës” së njeriut që e pasoi në drejtimin e Partisë Demokratike.
Duke reaguar, në fillim të dhjetorit të kaluar, Berisha organizoi një votim brenda partisë për të larguar Bashën nga udhëheqja e partisë, me 4,934 vota nga një asamble delegatësh. Asambleja miratoi gjithashtu statutet e reja për shfuqizimin e përjashtimit të Berishës nga partia parlamentare.
“Protothema” shkruan edhe mbi mundësinë e një formacioni të ri politik në të djathtë me Sali Berishën në krye, gjë që do të përçante konservatorët në Shqipëri.
“Vlerësohet se deputetët dhe Berisha do të formojnë një parti tjetër pasi Lulzim Basha i ‘preu kokën’ ish-kryeministrit. Pritet që partia e re që do të formohet në qendrën e djathtë do të jetë më shumë në opozitë me Partinë Demokratike se sa vetë socialistët e kryeministrit Rama, i cili tashmë e ka forcuar ndjeshëm monarkinë e tij”, shkruan gazeta greke.
