Tirana rikthehet të kryesojë e vetme në kampionat pasi rivalet e Kukësit kishin marrë 3 pikë dhe i kishin arritur në tabelë.
Në “Air Albania”, bardheblutë pritën Teutën tashmë të trajnerit Edi Martini, rikthimi i të cilit nuk ndryshoi shumë te durrsakët teksa u mundën 2-1.
Me ndeshjen që nisi e ekuilibruar dhe me skuadrat që studionin njëra-tjetrën, ekuilibrin e prishi një supergol i Totre nga jashtë zone që tregon edhe arsyen se përse Shehi e konsideron të pashitshëm lojtarin të paktën për në Janar.
Ndeshja hapet dhe bëhet më emocionuese teksa Teuta rrezikon 2 herë me Giorgiev dhe nuk shënon e nga ana tjetër, Seferi tregohet i rrezikshëm por në 33’ shpërdoron një rast pothuajse para porte.
Në 45’ një episod që do të diskutohet gjatë me arbitrin Dilaver Alla që akordon penallti për ndërhyrje të gabuar ndaj Seferit por VAR pas 6 minutash shqyrtim vendos anullimin e saj.
Pjesa e dytë nis më mirë për durrsakët që bëjnë presing dhe rrezikojnë me Giorgiev dhe Kallaku por pa gjetur portën.
Kur Teuta ishte hedhur përpara dhe po qëndronte lart, Tirana shfrytëzon në 68’ një kundërsulm të shpejtë duke dyfishuar rezultatin me Taulant Seferin.
Goli nuk e frenon Teutën që sërish ka raste për të shënuar me Kallakun që humbet një shans të artë në 77’ ndërsa në 82’ nuk gabon Gruda i cili shërbehet mjaft mirë në zone.
Rihapet ndeshja në “Air Albania” por minutat nuk mjaftojnë me Tiranën që merr 3 pikë të rëndësishme që e mbajnë në vend të parë por gara për titull është më e hapur se kurrë.
