Daja qan rastet e humbura: Duhej ta mbyllnim sfidën në pjesën e parë, mbajmë përgjegjësi se…
Trajneri i Partizanit, Ilir Daja, e ka cilësuar një humbje të pafat atë ndaj Kukësit. Tekniku ka theksuar për “SuperSport” pas sfidës se skuadra kishte bërë mirë deri te autogoli e aty më pas ekipi ishte demoralizuar.
“Duhej ta kishim përfunduar pjesën e parë në avantazh goxha më të madh se kishim raste para portës. Sigurisht në pjesën e dytë fituan territor, por gabimi ishte në golin e dytë. Ishte gabim taktik i joni, pa diskutuar autogolin se të vjen keq të humbësh një ndeshje të tillë. Nuk kishim çfarë të ndryshonim se rastet e goditjet në portën tonë nuk kishte nga kundërshtarët. Në golin e dytë ishte goditja e parë në portë e kundërshtarit.
Kemi bërë një pjesë të parë jashtëzakonisht të mirë ku duhej të shënonim më tepër se një gol se kishim raste pothuajse në çdo moment. Kështu është futbolli, nëse nuk shënon do ta pësosh edhe me autogol. Të gjithë u demoralizuan dhe bënë atë gabim te goli i dytë që merr topin pranë anësores dhe shkon deri në zonën e golit. Mbajmë përgjegjësi ne se ekipi ishte vendosur gabim në fazën e mbrojtjes.
Përderisa shpërdorojmë shumë gola, duhet që me lojtarët që kemi të jemi më të qetë para portës. Në disa momente mund të jemi më altruistë e shërbejmë njëri-tjetrin se përderisa krijojmë kaq shumë, lojtarët bëjnë diçka që shkojnë në zonë. Por pjesa e finalizimit është anë psikologjike se nëse do të kishim pikët që na mungojnë në fazën e parë, ndoshta finalizimi do të ishte edhe pak më i mirë”, tha Daja.
